İqtisadiyyat

Qarabağ torpaqları buğda idxalından asılılığı azalda bilərmi? – Ekspert

“İşğaldan azad olunmuş torpaqlarımız əsasən dağlıq ərazilər və örüş sahələrindən ibarətdir. Burada əkin sahələri çox az həcmdədir. Bu isə imkan vermir ki, həmin ərazilərdə buğda əkməklə ölkənin idxaldan asılılığını əhəmiyyətli dərəcədə azalda bilək”.
Bunu Qaynarinfo-ya açıqlamasında kənd təsərrüfatı mütəxəssisi Vahid Məhərrəmov Azərbaycanın işğaldan azad edilmiş ərazilərində istehsalı həyata keçirmək hesabına buğda idxalına son qoyulmasının mümkün olub-olmayacağından danışarkən deyib:
“Bu il buğda idxalı həcminin azalması qiymətin kəskin bahalaşması ilə bağlıdır. Belə vəziyyətdə, idxalçılar buğda almağa o qədər də çox maliyyə resursu xərcləməyə risk etmir”.
Ekspertin fikrincə, əsas məsələ məhsuldarlığın artırılmasıdır:
“Ölkəmizin ərzaq buğdasına olan tələbatı ödəmək üçün məhsuldarlığı artırmalıyıq. Amma Azərbaycanda cari ildə məhsuldarlıq son iki ilə nisbətən aşağı düşüb. Rusiya kimi geniş ərazimiz yoxdur ki, daha geniş ərazidə əkin əkməklə buğdaya olan tələbatı ödəyə bilək. Yəni ekstensiv yolla bu sahəni inkişaf etdirmək mümkün deyil”.
Buğda istehsalı üzrə məhsuldarlığı artırmaq üçün isə həmsöhbətimiz Özbəkistan təcrübəsindən yararlanmağı məsləhət bilir:
“Özbəkistan hektardan 49,5 sentner buğda götürüb. Azərbaycanda isə bu rəqəm cəmi 31 sentnerdir. Halbuki Azərbaycanın torpaq-iqlim şəraiti Özbəkistanda olduğundan daha münbitdir. Su resursumuz da daha çoxdur. Amma Azərbaycanda torpağın münbitliyinin bərpası istiqamətində demək olar ki, işlər aparılmır. Suvarma suyuna olan ehtiyac ödənilmir. Növbəli əkin sistemi yaradılmayıb. Bunun üçün də ciddi dövlət proqramı hazırlanmalı və bu zaman bacarıqlı mütəxəssisləri prosesə cəlb etmək lazımdır. Yeni, məhsuldar, isti-soyuğa dözümlü sortlar yaradılmalıdır. Seleksiya işləri daimi getməlidir”.
V. Məhərrəmov düşünür ki, yuxarıda dedikləri həyata keçərsə, işğaldan azad edilmiş ərazilər hesabına torpaq ərazisini genişləndirmədən ölkənin ərzaq buğdasına olan tələbatını yerli istehsal hesabına ödəmək mümkün olar:
“Əsas odur ki, mövcud potensialımızı reallaşdıra bilək”.

Əlaqəli xəbərlər

Bir cavab yazın

Sizin e-poçt ünvanınız dərc edilməyəcəkdir.

Back to top button