Ötən tur Birinci Divizionun ən maraqlı qarşılaşmalarından biri Tovuzda keçirildi. Tovuzu təmsil edən yerli “Turan Tovuz” Gəncə klubu “Kəpəz”lə qarşılaşıb. “Qərb derbisi”ndə qələbə qazanan tərəf elə Əfqan Talıbovun rəhbərik etdiyi Tovuz təmsilçisi oldu. 2:3 hesabı ilə rəqibinə məğlub olan “Kəpəz”in azarkeşləri nəticə ilə yanaşı, matçın təşkilatçılığından da narazı qalıblar. Belə ki, görüş zamanı “Kəpəz” azarkeşləri 44 günlük müharibədə şəhid olan əsgərlərin pankartını açmaq istəsələr də, onlara imkan verilməyib.
Bu haqda “Kəpəz”in adını açıqlanmasını istəməyən azarkeşlərindən biri Qaynarinfo-ya məlumat verib. O, narazılığını belə ifadə edib: “Oyun başlayanda pankart açmaq istədik. Ancaq polis əməkdaşları narazılıqlarını bildirdi. Onlara vurğuladıq ki, dünyanın hər yerində, Azərbaycanda bütün stadionlarda pankart açılıb. Lakin tapşırıq aldıqlarını bildirdilər. Belədə 44 günlük Vətən müharibəsində döyüşmüş iki şəhidimizin – Anar Məmmədov və Əmrah Rəcəbovun pankartlarını açmaq istədik. Orada ümumilikdə 4 zabit vardı. Leytenantlardan şəhid pankartına icazə verilməməsinin səbəbini soruşduq. Dedilər, AFFA bizə belə tapşırıq verib ki, pankart açılmasın. Halbuki stadiondakı tribunaların məhəccərlərində Futbolun İnkişaf Fondunun pankartı var idi. Ona görə də bunu şəhidlərimizə qarşı hörmətsizlik kimi qəbul edirik”.
Azarkeşlərin narazılığı ilə bağlı matçın AFFA nümayəndəsi Bəhram Qurbanovla da danışdıq. Qurbanov azarkeşlərə heç bir maneçilik törətmədiyini söylədi: “Yalan danışırlar. Onlara heç kim müdaxilə etmədi. Oyunda cəmi bir dənə – Yaşar (“Kəpəz”in baş məşqçisi Yaşar Vahabzadə – red.) haqqında pankart açmışdılar. Polislərə şəxsən özüm tapşırmışdım ki, pankart açmağa mane olmasınlar. Oyun boyu “istefa, istefa” qışqırırdılar. Elə şey ola bilər ki, pankart açmaq istəsinlər, amma onlara icazə verməyək? Yalandı, şəhidlər haqqında pankartın açılmasına icazə verməməyimiz mümkün deyil. Şəhidlərə başımız qurbandır. Onlar heç pankart açmaqla bağlı bizə müraciət də etməmişdilər. Yaşarla bağlı panktart açmışdılar, başqa heç nə yox idi. Varsa, bundan xəbərim olardı. Polislər də onlara müdaxilə etmədilər”.