“Regionun iqtisadi və nəqliyyat infrastrukturunun blokadadan çıxarılması Ermənistan iqtisadiyyatının məzmununu və strukturunu keyfiyyətcə dəyişə bilər”. JAMAZ.İNFO xəbər verir ki, bunu Ermənistanın baş naziri Nikol Paşinyan deyib.
Təhlükəsizlik sisteminin inkişafı baxımından, baş nazir, təkcə ordunun modernləşdirilməsinin, onun müdafiə qabiliyyətinin artırılmasının vacibliyini deyil, həm də Ermənistanın ətrafında əlverişli xarici mühitin yaradılmasının vacibliyini qeyd edib. “Dinc inkişaf dövrünə girmək üçün gündəmdəki məsələləri ardıcıl olaraq həyata keçirmək də vacibdir. Bu, Ermənistana, Qarabağa, bütün regionumuza aiddir. Biz hesab edirik ki, bu, Cənubi Qafqaz regionunda düşmənçilik mühitini aradan qaldırmağın yeganə yoludur. Bunun sayəsində biz Dağlıq Qarabağ münaqişəsi ilə bağlı danışıqlar prosesini bərpa edə və həll edə biləcəyik. Məhz bu, bizə regional iqtisadi və nəqliyyat infrastrukturunu blokadadan çıxarmağa imkan verəcək. Bu, yerli infrastrukturun inkişafı üçün əlavə təkan ola bilər, uzunmüddətli inklüziv iqtisadi artımı təmin edə bilər, iqtisadi fəaliyyət göstərmək istəyən Ermənistan vətəndaşları üçün bərabər şərait yaradar, yerli və xarici investorlar üçün iqtisadiyyatın cəlbediciliyini əhəmiyyətli dərəcədə artırar ”.
