Bakı Şəhər İcra Hakimiyyətinin başçısı Eldar Əzizov ciddi problemlə üzləşib. JAMAZ.İNFO-ya verilən məlumata görə, problemə səbəb Əzizovun vəzifə başında olan dövründə keçirilən tenderlərlə bağlıdır.
Məlumatda deyilir ki, hazırda Əzizovun Bakı meri təyin olduqdan sonra keçirilən tenderlər araşdırılır. Belə ki, həmin tenderlər üzrə ayrılmış vəsaitlərin təyinatı üzrə xərclənmədiyi, rəqəmlərin şişirdildiyi, habelə yaxın çevrəyə aid olan şəxslərə verilməsinə dair tutarlı məlumatların olduğu deyilir. JAMAZ.İNFO-ya çatan xəbərlərdə qeyd edilir ki, məsələni araşdıran qurumlar qısa müddətdə 10-dan çox tenderlə bağlı qanun pozuntuları, habelə korrupsiya halları aşkarlayıblar. Elə bu səbəbdən də Əzizovun icra başçısı olduğu dövrdə BŞİH-nin keçirdiyi bütün tenderlərin araşdırımasına qərarı verilib.
Məlumatlarda o da qeyd olunur ki, aparılan araşdırmalardan sonra Eldar Əzizovun işdən çıxarılması reallaşa bilər. Lakin məsələnin təkcə işdən çıxarılma ilə yekunlaşmaya da biləcəyi istisna edilmir. Bildirilir ki, prosesin gedişatı fonunda Bakı merinin mülkləri, biznesi dəymiş zərər müqabilində müsadirə oluna və ya əlindən alına bilər.
Qeyd edək ki, son dövrlər icra başçılarının məhz korrupsiya faktlarına əsasən həbs edilməsi, Eldar Əzizov üçün də keçərli ola biləcəyi sualını gündəmə gətirir. Lakin mənbələr həbs ehtimalını az hesab edirlər. Onların sözlərinə görə, Bakı kimi bir şəhərin merinin məhz korrupsiya məsələsi ilə həbs edilməsi hakimiyyət üçün heç də uğurlu tapıntı hesab olunmur. Ona görə də, buna gedəcəkləri inandırıcı deyil.
